Gipadayag ni Atty. Eddie Cuaresma nga sa pagkakaron, walay lig-on nga basehan aron molampus ang impeachment case batok kang Presidente Ferdinand “Bongbong” Marcos Jr.
Sa pakighinabi sa Bombo Radyo Malaybalay, iyang gibutyag nga bisan pa sa mga alegasyon bahin sa “ghost flood control projects,” wala pa’y nakitang direktang ebidensya nga nagpakita nga ang Presidente mismo ang nagmando sa iregularidad. Matud niya, bisan pa og ang Presidente ang nagpirma sa budget sa naglabay nga tulo ka tuig, gikinahanglan ang lig-on nga pruweba sama sa dokumento, video, memorandum, o personal nga kahibalo aron mapamatud-an ang krimen.
Gipasabot usab ni Cuaresma nga ang National Expenditure Program moagi sa Bicameral Conference Committee (Bicam), diin posibleng nahitabo ang pipila ka “insertions” sa mga proyekto nga kalambigitan sa uban pang senador ug kongresista. Ang kasamtangang alegasyon, matud niya, maisip lamang nga “broken dots” o indirektang timailhan nga dili igo aron ma-convict ang usa ka sitting president.