Hugot nga gisalikway sa hingtundan sa komitiba sa umaabot nga Kaamulan Festival ang nagkaylap nga balita nga nagpasipala sa mas dakong katungod sa mga kaigsuonang lumad sa maong kalihukan ning lalawigan sa Bukidnon.
Giklaro ni Provincial Events Committee Chair Jun Cruz nga dili tinuod ang mga naghitak nga isyu sa social media nga walay gigahin nga lugar nga pagatukuran og booth alang sa mga tribung lumad sa umaabot nga tinuig nga selebrasyon sa Kaamulan Festival sa dakbayan.
Sa pakighinabi sa Bombo Radyo Malaybalay gipadayag niini nga adunay gigahin nga usa ka dako nga pavilion nga adunay dibisyon alang sa matag usa sa pito ka tribu sa probinsya aron makapakita sa ilang kultura ug makabaligya sa ilang mga produkto.
Dugang pa niini, nga adunay usab booth ang National Commission on Indigenous Peoples o NCIP alang sa mga lumad nga mga partisipante.
Giklaro usab ni Cruz nga 98% ngadto sa 99% sa mga negosyante / vendors karon mga lokal gikan sa Bukidnon ug giuna gayud ang mga taga-probinsya sa pag-apil sa maong kalihokan.Â
Gibutyag usab niini nga kapin sa 250 ka booths ang giandam alang sa festival bisan pa nga miabot sa 2,000 ngadto sa 3,000 ka aplikante ang gustong mahimong concessionaire, busa gipahigayon ang bunot-bunot nga sistema aron patas nga mapili ang mga makakuha og pwesto.
Sa laing bahin, giingon ni Cruz nga 98% ngadto sa 99% na usab nga andam sa probinsya alang sa festival nga opisyal nga ablihan karong Marso 19, uban sa kooperasyon sa PNP, CSU, Bureau of Fire Protection ug ubang ahensya aron masiguro ang kaluwasan sa mga mananambong.