Nakadani og daghang bisita sa Northampton, England ang usa ka kalapati nga adunay hayag nga berde nga kolor, nga giingong unang nakita niadtong Hunyo ug talagsa lang kini makit-an.
Mikaylap ang daghang video sa maong langgam sa TikTok, hinungdan nga daghang tawo ang nangadto sa maong lugar aron lang makakita sa maong pigeon o kalapati.
Matod pa sa mga lumolupyo, adlaw-adlaw adunay motambong nga mga bisita.
Miabot pa gikan sa London ang ubang turista, samtang ang uban nanggikan sa layo nga mga dapit aron lang masaksihan ang langgam nga hinungdan sa kasikat sa Northampton nga kaniadto wala mailhi nga destinasyon sa mga biyahero.
Gipasabot sa pipila ka mga tawo nga posibleng ang balahibo sa langgam nausab ang kolor tungod sa pagkaon niini og butang nga naghatag og epekto sa kolor.
Apan adunay nagtuo nga tingali kini gitina lang.
Gikwestyon kini sa kadaghanan, ilabi nga daan na kini gipasidan-an sa Royal Society for the Prevention of Cruelty to Animals nga ang pagpintal o pagtina sa mga langgam delikado ug makadaut sa ilang kahimsog.