Padayon ang Police Regional Office 10 sa operasyon batok illegal nga droga ug smuggled nga sigarilyo bisan pa sa Semana Santa, aron mapugngan ang pagsaka sa kriminalidad samtang daghang katawhan ang magbiyahe ug magpista sa nagkadaiyang lugar sa rehiyon.
Sumala ni PMaj. Joann G. Navarro, ipatuman ang heightened alert status sugod Marso 29 diin ipatuman ang no-leave policy ug palugwayan ang duty hours sa kapulisan aron mas mapalig-on ang presensya sa kadalanan pinaagi sa foot ug mobile patrols. Bisan pa sa dugang visibility, gipasiugda nga mas pahingusgan pa ang operasyon batok sa illegal drugs, illegal mining, illegal gambling ug uban pang kalapasan sa balaod. Personal usab nga mag-inspection si PBGen. Christopher N. Abrahano uban ang ubang opisyal aron maseguro ang epektibong implementasyon sa “Ligtas Simana Santa 2026.”
Dugang pa, gi-awhag sa kapulisan ang publiko nga makigtinabangay pinaagi sa pagreport sa mga baligya sa smuggled nga sigarilyo sa merkado, samtang gipasiguro nga dili tolerahon ang bisan kinsa sa ilang hanay nga malambigit sa ilegal nga kalihokan ug aksyunan dayon ang mga reklamo.