Gitutokan karon sa Bukidnon Police Provincial Office ang hugot nga preparasyon aron masiguro ang hapsay ug malinawon nga pagsaulog sa Kapaskohan sa tibuok probinsya.
Sa eksklusibong pakighinabi kang PCpt. Sheila Joy Jangad, tigpamaba sa Police Regional Office X, gipadayag niini nga aduna nay implementation plan nga gisugdan niadtong Disyembre 1 ug molungtad hangtod sa unang semana sa Enero ubos sa kampanyang “Ligtas Paskohan 2025.”
Matud ni PCpt. Jangad, naglakip ang maong lakang sa pagpalig-on sa presensya sa kapulisan hilabi na sa pagsugod sa Simbang Gabi, diin gitutokan ang seguridad sa mga sagradong lugar, simbahan, ug uban pang dapit nga adunay daghang deboto.
Gipasabot usab nga gipahugtan sa BukPPO, ang pagbantay sa mga terminal hubs sama sa bus terminals aron malikayan ang posibleng krimen, samok, congestion, ug hulga sa seguridad tungod sa pagtaas sa gidaghanon sa mga pasahero nga mubiyahe gikan ug padulong sa Lalawigan sa Bukidnon.
Lakip usab nga labing gitutokan ang seguridad sa mga tourist spots sa probinsya, nga posibleng dagsaon sa mga bisita atol sa holiday season.
Giprayoridad usab ang intensified police visibility, mas paspaspas nga pagresponde sa mga insidente, coordinated checkpoints, ug pagpalig-on sa kooperasyon tali sa kapulisan, tanod, barangay officials, ug komunidad.