Kapin 150 ka volcanic quakes ug 344 ka rockfalls, natala sa Mayon sulod sa 24 oras

Nagpabiling anaa sa “high level of unrest” ang Bulkang Mayon human makatala ang PHIVOLCS og sunod-sunod nga volcanic earthquakes ug rockfall events sa milabay nga 24 ka oras.

Sumala sa taho sa PHIVOLCS karong Lunes, April 6, moabot sa 159 ka volcanic earthquakes ug 344 ka rockfall events ang natala sa palibot sa bulkan.

Gawas niini, naobserbahan usab ang 12 ka pyroclastic density current (PDC) signals o ang gitawag nga “uson,” dungan sa padayon nga pag-agas sa lava gikan sa crater niini.

Tungod sa maong aktibidad, pabilin ang Alert Level 3 sa Bulkang Mayon.

Hugot nga gipahinumdoman ang publiko nga likayan ang pagsulod sa 6-kilometer radius Permanent Danger Zone (PDZ) tungod sa risgo sa kalit nga pagbuto, rockfalls, ug pag-agas sa lava.