Gikompirma sa Department of Justice (DOJ) nga kauban nga respondent ni Senador Jinggoy Estrada sa kasong plunder may kalambigitan sa flood control projects ang kanhi kalihim sa Department of Public Works and Highways (DPWH) nga si Manuel Bonoan.
Sumala ni Justice Spokesperson Atty. Polo Martinez, nalakip ang kanhi kalihim sa mga gipasakaan sa National Bureau of Investigation (NBI) og reklamong plunder tungod sa giingong iregularidad sa mga proyekto sa gobyerno. Giklaro ni Martinez nga ang kaso wala lang nagpunting sa usa ka proyekto, kondili sa kinatibuk-ang kantidad sa giingong nakaw nga bahandi nga milapas sa P50 ka milyon.
Matod pa, kini resulta sa kombinasyon sa pipila ka mga transaksyon nga may kalabotan sa anomaliya sa flood control projects. Sa pagkakaron, wala pa’y gitakda nga petsa alang sa pagsugod sa preliminary investigation sa maong plunder case. Dugang sa tigpamaba, itudlo ang usa ka panel of prosecutors nga maoy mogunit sa kaso ug mo-isyu og mga subpoena ngadto sa mga hingtungdan.