Miinsistir ang Department of Justice (DOJ) nga magpabilin gihapon sa prisohan si kanhi Negros Oriental Rep. Arnolfo Teves Jr. bisan pa sa iyang pagka-abswelto sa usa ka murder case niadtong 2019, tungod kay aduna pa siyay laing mabug-at nga mga kasong giatubang.
Matod sa DOJ, wala pa sila makadawat og opisyal nga kopya sa desisyon sa korte nga nagbasura sa kaso, ug nagpadayon gihapon ang iyang pag-atubang sa ubang kasong murder ug kriminal nga gipasaka batok kaniya.
Kagahapong adlawa, gibasura sa Manila Regional Trial Court Br. 15 ang kasong murder ni Teves Jr. may kalabutan sa pagpatay kang kanhi board member Michael Dungog.
Giuyonan sa korte ang “demurrer to evidence” nga gisumite ni Teves ug sa iyang mga kaubang akusado. Sa pikas bahin, gikalipay sa kampo ni Teves ang maong acquittal.
Matod sa iyang abogado nga si Atty. Ferdinand Topacio, ang maong kaso igo lang nga pagpanlupig batok sa kanhi kongresista.