Nagsang-at og petisyon si Atty. Ernest Levanza, abogado ni kanhi engineer sa Department of Public Works and Highways (DPWH) nga si Brice Hernandez, og ‘writ of amparo’ sa korte sa Pasay, human kini ibalhin ngadto sa Pasay City Jail.
Matud ni Atty. Levanza, ang maong petisyon nga gisang-at sa Branch 12 sa Pasay Regional Trial Court nagtinguha sa ‘temporary protection order’ ug aron mapailawom si Hernandez sa Witness Protection Program.
Gipanghimakak sa abogado, nga si Hernandez walay kaso nga gipasaka batok niini ug wala usab kini ma-convict sa bisan unsang sala, busa gikwestyon niini nganong gidala si Hernandez sa city jail.
Dugang pa ni Atty. Levanza, si Brice Hernandez nakadawat og mga hulga sa iyang kinabuhi human kini mitestigo sa House of Representatives kabahin sa mga iregularidad.
Mas misamot pa kini human niya panganlan ug idawit ang pipila ka mga senador nga giingong nalambigit sa maanomaliyang flood control projects.