Giburagan ni House Committee on Justice Vice Chairman ug Baguio City Representative Mauricio Domogan nga walay igo nga ebidensya nga makapamatood nga naggamit og iligal nga droga si Presidente Ferdinand Marcos Jr..
Ang maong isyu usa sa mga basihan nga gigamit sa unang impeachment complaint batok sa presidente nga sa ulahi gibasura sa komite.
Sumala ni Domogan nga walay lig-on nga ebidensya nga nagpakita nga naggamit o nag-abuso sa iligal nga substansya ang pangulo.
Dugang ni Domogan, nga dili bug-at ang testimonya ni Senadora Imee Marcos mahitungod sa giingong paggamit sa iyang manghod og iligal nga droga, gumikan wala kini ma-validate ug wala usab kini sworn statement.
Gipasiugda sa mambabalaod nga puro alegasyon lamang ang maong isyu ug walay dokumento sama sa medical report nga makapamatood niini, lisod usab mapamatud-an bisan sa regular nga korte o impeachment court.
Kahinumduman nga niadtong Nobyembre, mitambong si Sen. Imee Marcos sa rally sa Iglesia Ni Cristo diin gibutyag nga naggamit og iligal nga droga ang iyang manghod, ug dugay na kining ginabuhat bisan wala pa kini nahimong presidente.
Apan, una nang gipanghimakak sa Malacañang ang maong mga alegasyon.