Nakakuha og atensyon ang usa ka high school sa Changhua County sa Taiwan human nga gipahigayon ang talagsaong paagi sa paghatag og graduation certificates sa mga estudyante diin kinahanglan una silang mokatkat sa bungbong nga sama ka gitas-on sa lima ka andana nga building.

Bag-ohay lang, ang solo climb ni Alex Honnold sa Taipei 101 nakapukaw og interes sa extreme climbing sa isla. Apan wala mahibal-an sa kadaghanan nga dugay na diay nga ginahimo sa Ershui Junior High School ang pag-apil sa rock climbing isip kabahin sa ilang graduation requirements.

Sulod sa eskwelahan makita ang giingong pinakataas nga climbing wall sa Taiwan.

Dili kini para sa display lamang, kay ang mga estudyante gihatagan og unom ka climbing lessons matag semester ug kinahanglan nilang makatkat sa 15-metros nga rock wall aron mahimong kwalipikado sa pagdawat sa ilang graduation certificates.

Ang maong pamaagi gitumong dili lamang sa pagsulay sa pisikal nga kusog sa mga estudyante, kundili aron mapalambo usab ang ilang konsentrasyon, balanse, ug koordinasyon sa lawas.

Bisan og makalilisang tan-awon ang rock wall nga parehas kataas sa lima ka andanang building, kadaghanan sa mga estudyante wala mahadlok niini gumikan nalingaw sila sa rock climbing.

Ang pipila pa niini, ginaduyogan pa sa ilang mga ginikanan sa pagkatkat kung adunay libre nga oras.