Pangunahan sa Diocese of Malaybalay ang halapad nga protesta batok korapsyon karong adlawa uban sa mga deboto, relihiyosong organisasyon, ug parokyano sa siyudad. Kini aron ipadayag ang kasuko sa halapad nga korapsyon lakip ang pagpangayo sa responsable ug transparent nga gobyerno.
Ang kalihokan magasugod sa San Isidro Cathedral ug moparada padulong sa Plaza Rizal. Magsugod kini sa Santos nga Misa nga pangunahan ni Monsignor Cirilo “Loloy” Sajelan sa alas 11:45 sa buntag, ug human niini ipadayon ang rally nga gilauman molungtad sa duha ka oras uban sa mga mamumulong gikan sa lain-laing sektor.
Sumala ni Archbishop Noel P. Pedregosa sa Diocese of Malaybalay, limitado ang moapil sa 5 hangtod 10 ka tawo kada simbahan, lakip ang parish priest ug assistant parish priest, apan abli kini sa tanan nga gustong makiglambigit tungod kay kini usa ka isyu sa moralidad ug maayong pagdumala.
Gipangandaman ang water dispensers, designated medic stations, ug parking areas, samtang ang seguridad gikoordinar sa pulis, traffic enforcers, ug CDRRMO. Gibutyag ni PCPT Sheila Joy Jangad, tigpamaba sa Bukidnon Police Provincial Office, nga full alert status ang tibuok pwersa, uban sa intensified police visibility ug dugang deployment aron malikayan ang kagubot.