Paslak sa bilangguan ang suspetsado diin gikaingong usa ka pulis human madakpan gumikan sa pagpangholdap sa usa ka tindahan sa may Brgy. Damilag, Manolo Fortich, Bukidnon.
Takna alas 6:45 sa buntag, ning adlawa, nadawat sa Manolo Fortich MPS ang tawag gikan sa usa ka 59-anyos nga negosyante nga nagpuyo sa Brgy. Tankulan ug tag-iya sa 7/11 Convenience Store-Damilag Branch.
Gibutyag niini nga gitulis ang iyang tindahan nga nahimutang sa Purok-13, Brgy. Damilag.
Gilayong miresponde ang duty investigator ug Quick Response Team (QRT) nga gipangulohan ni PLTCOL. EVARY E. BACUNAWA, Officer-in-Charge sa Manolo Fortich MPS aron susihon ang maong taho.
Daling gipahigayon ang hot pursuit operation sa Manolo Fortich MPS ug sa wala pa milabay ang alas 9 sa buntag banda alas 8:40 sa buntag, nadakpan ang suspetsado sulod sa iyahang panimalay.
Subay sa imbesgason, mukabat sa kapin o kulang P12,000 ang giingong nakuha sa suspetsadong nanulis sa usa ka tindahan sa maong lugar.
Ang dinakpan gikumpirmang miyembro sa kapulisan, hingkod ang pangidaron, nakadestino sa Malaybalay City Police Station ug residente sa Menzi Village, Damilag.
Base sa report sa kapulisan, pasado alas 4 sa kaadlawon, namatikdan sa cashier sa 7/11 Store sa maong lugar ang lalaking sige og balik-balik sa gawas sa tindahan.
Paglabay sa pipila ka minuto, misulod kini ug namalit og pipila ka butang, dayon mideklarar sa cashier og tulis.
Kabahin niini nagpasalig nga dili nila tugotan ang bisan unsang lihok nga makadaot sa integridad sa kapulisan ug ang mga nagbinuang nga miyembro sa PNP manubag sa balaod.
Sa pagkakaron, padayon ang imbestigasyon ug tukmang proseso batok sa suspetsado.