Nagsugod na og imbestigasyon ang Department of Energy (DOE) sa gatusan ka reklamo nga nadawat niini tungod sa sunod-sunod nga bigtime oil price hike.
Sumala ni Secretary Sharon Garin sa DOE, daghan na ang reklamo nga nadawat pinaagi sa “Gas Station Concerns” feature sa eGovPH nga gihimo uban sa Department of Information and Communications Technology (DICT).
Matud ni Garin, sa miaging semana pa lamang, sa wala pa ipatuman ang double-digit nga pagsaka sa presyo sa lana diin hapit 100 ka reklamo na ang nadawat sa DOE ug gisusi na kini sa ahensya.
Sa pipila ka kaso, ang mga personnel sa DOE mismo ang miadto sa mga gasolinahan nga giireklamo aron maghimo og imbestigasyon, samtang sa uban nga lugar ang kapulisan ang nagdumala sa pag-verify.
Sukad niadto, misaka pa ang gidaghanon sa reklamo, ilabi na sa mga gasolinahan nga giingong nagbaligya og produkto sa presyong lapas sa makatarunganong price range.
Hangtod sa tunga-tunga sa semana, niabot na sa 500 ka reklamo ang nadawat sa DOE ug padayon pa kini nga ginaproseso.
Giangkon usab sa kalihim nga kulang ang manpower sa DOE aron personal nga matan-aw ang tanang lugar nga adunay reklamo.
Tungod niini, nakig-koordinar na ang ahensya sa Department of Trade and Industry ug sa mga law enforcement agencies aron motabang sa pag-verify sa mga reklamo.
Ang pipila sa mga gasolinahan nga unang gipadad-an og show-cause order nakapadala na usab sa ilang mga tubag ug mag ngadto sa DOE.