Nagpagawas og desisyon ang federal judge sa California nga ilegal ang gihimo ni US President Donald Trump sa pagpadala og mga National Guard sa Los Angeles.
Sa desisyon ni US District Judge Charles Breyer, giingon nga nalapas ni Trump ang Posse Comitatus Act diin usa ka balaod nga nagalimitar sa paggamit sa military sa sulod sa nasud alang sa civil law enforcement.
Ang maong ruling dili pa mapatuman hangtod sa Setyembre 12, tungod kay gilauman nga iapela kini sa kampo ni Trump.
Matud pa ni Trump, iyang gipakatag ang National Guard aron makigbatok sa kriminalidad sa Los Angeles, ug plano usab niya nga buhaton kini sa Chicago, susama sa iyang gihimo sa Washington D.C. ug Los Angeles.
Apan sa pikas bahin, giangkon sa mga kritiko nga ang maong lihok ni Trump makapadugang lamang sa krisis imbes nga makasolbad niini.
Matud ni Illinois Lieutenant Governor Juliana Stratton, dili luwas ang mga residente sa plano ni Trump ug kini mahimong hinungdan sa kagubot.
Giingon usab ni Democratic Rep. Chuy Garcia nga dili tinuod nga “law and order” ang tuyo ni Trump, kondili pagpanghadlok ug pagkontrol sa mga kritiko.
Andam usab si Attorney General Kwame Raoul nga pasakaan og kaso si Trump kung ipatuman ang plano nga pagpakatag og National Guard sa Chicago.