Walay puruhan o dili awtomatiko nga mahimong state witness si kanhing DPWH official Henry Alcantara taliwala sa pag-uli niini og P110 milyon isip restitution sa kaso sa flood control projects, sumala sa Department of Justice.
Gikaingon nga ang pagbalik sa kwarta usa lamang ka mitigating act ug dili garantiya nga mahatagan siyag immunity isip testigo sa estado.
Kinahanglan mapamatud-an nga dili siya ang nag-unang mastermind, adunay klaro ug kompleto nga testimonyo batok sa mas dako nga mga akusado, ug ang iyang ebidensiya dili makuha sa ubang paagi.
Gibutyag ni Acting Secretary Frederick Vida sa DOJ, kabahin lamang ang maong lakang sa mga kondisyon nga gilatid sa balaod.
Sa pikas bahin, naglaum ang kampo ni Alcantara nga mapili gihapon siya nga state witness tungod sa iyang kooperasyon ug kahimtang isip usa sa mga nakatampo sa pag-imbestiga sa anomalya sa proyekto sa flood control.