Nasikop ang usa ka empleyado sa Provincial Government sa usa ka drug buy-bust operation sa Malaybalay City. Gipahigayon ang operasyon sa mga sakop sa CDEU-Malaybalay pasado alas 12:10 sa udto, Septiyembre 28, 2025, sa Purok-1, Barangay 9, Malaybalay City.
Ang suspetsado, 33 anyos, adunay live-in partner ug residente sa maong lugar, napalitan og usa ka pakete sa gituohang shabu nga nagkantidad sa 500 pesos. Sa body search, nakuha gikan sa dinakpan ang tulo pa ka pakete sa gituohang shabu nga gibana-bana sa 5 gramos ug mabalor sa 34,000 pesos, apil na ang buy-bust money ug usa ka coin purse.
Sa laing operasyon, nasikop sa kapolisan sa Valencia City ang usa ka 30-anyos nga lalake nga nailhan sa alyas “Jonel” pasado alas 5:54 sa hapon sa Purok 13, Barangay Batangan. Nakumpiskar gikan sa dinakpan, nga taga Purok 19, Barangay Poblacion, ang drug paraphernalia ug gituohang shabu nga gibanabanang nagkantidad sa ₱82,280.
Padayon pang gipangita ang laing tulo ka kauban niini. Anaa na usab sa kustodiya sa Valencia City Police Station ang suspek alang sa hustong disposisyon.
Sa pagkakaron, ang mga dinakpan anaa na sa Valencia ug Malaybalay City Police Station ug pasakaan kini ug kaso sa paglapas sa RA 9165 o Comprehensive Dangerous Drugs Act of 2002.