Nagpadayag og kabalaka ang mga eksperto sa ekonomiya kalabot na sa nagkagrabe nga tensyon ug eskalasyon sa panagbangi sa Iran, diin ginalantaw nga adunay “kurat” o paspas nga epekto sa ekonomiya sa nasud.
Matud pa ni Ray Talimio Jr., kanhi presidente sa Oro Chamber ug miyembro sa Economic Development Committee sa RDC-X, wala damha nga moabot sa ingon niini nga punto ang sitwasyon diin anaa na kini sa ikaunom o ikapito nga adlaw nga walay klarong timailhan sa ceasefire o de-escalation nga adunay dakong epekto sa fuel supply.
Gipasabot ni Talimio nga ang padayon nga eskalasyon sa giyera maoy hinungdan sa pagka-constrict o pagkunhod sa supply sa lana sa tibuok kalibutan. Tungod kay ang Pilipinas usa ka “net oil importer,” gilauman nga masinati dayon ang epekto niini sa lokal nga merkado.
Dugng pa sa ekonomista nga, masinati gayud ang maong epekto sa mas sayong panahon ilabi na ang pagsaka sa inflation nga magdala og bug-at nga epekto sa katawhan sa pagtaas sa presyo sa mga palaliton.
Lakip sa gikabalak-an karun mao ang pagpangita og mas dakong kantidad sa piso batok sa dolyar alang sa pagpalit og fuel sanglit mameligro ang suplay sa nasud.