Eala napakyas sa una nga round sa Guangzhou Open

Sayong natapos ang kampanya ni Pinay tennis star Alex Eala sa Guangzhou Open sa China.

Napildi si Eala batok sa Amerikanang si Claire Liu sa iskor nga 6–2, 4–6, 4–6 sa una nga round sa torneo.

Sa pagsugod, kontrolado ni Eala ang duwa, apan pag-abot sa ikaduhang set, miatake si Liu, nga ranked 305, ug nakabawi hangtod sa kataposang set.

Wala na tugoti ni Liu si Eala nga makabawi, ug natapos ang duwa sulod sa duha ka oras ug 28 minutos.

Kini nga kapildihan mao na ang ikatulong unang-round exit ni Eala sa lima ka torneo.

Bisan pa sa kapildihan, mobalik si Eala sa court karong Miyerkules, Oktubre 22, aron makigsangka sa doubles uban ang Ukrainian nga si Nadia Kichenok.