Liboan ka pamilya ang apektado sa sunod-sunod nga pag-ulan miaging adlaw diin mukabat sa kapin kon kulang P23M nga damyos sa agrikultura ang naitala.
Matud ni Arian Johnson Caga-anan, Operations and Warning Division Head sa City Disaster Risk Reduction and Management Office (CDRRMO) sa dakbayan sa Malaybalay, nga base sa report gikan sa Rapid Damage Assessment and Needs Analysis (RDANA) team, nga hinay-hinay nang namalik sa ilang mga panimalay ang mga apektado sa pagbaha diin gikumperma niini nga kapin sa liboan ang naapektuhan.
Gibutyag usab ni Caga-anan, nga dul-an P23 milyones ang damyos sa agrikultura diin mukabat sa dul-an 800 ka ektarya kahumayan ug mais ang nadamyos, lakip na usab ang kapin kon kulang 3500 square meters nga agri-fisheries nga na igo sa pagbaha sa mga Barangay sama sa Barangay Managok, Violeta, Simaya, Apo Macote, Sinanglanan, Sto Niño ug San Martin.
Padayon ang paningkamot sa lokal nga panggamhanan sa pagkumpleto sa RDANA aron masiguro ang tukmang aksyon ug tabang sa mga apektadong residente, pinaagi sa koordinasyon sa nagkadaiyang ahensya sa gobyerno ug mga residenteng apektado sa pagbaha.