Mukabat sa dul-an usa ka milyones ka pesos ang kadaut human masunog ang usa ka commercial building sa Purok 4, West Poblacion, Kalilangan Bukidnon, niadtong makalabayng adlaw..
Sumala kang FO2 Jerome Ampatua sa Bureau of Fire Protection Kalilangan, nadawat nila ang alarma alas-9:57 sa gabii ug pag-abot sa mga bombero, hapit 70 porsyento sa building ang gilamoy na sa kalayo.
Ang establisemento gipanag-iyahan sa Consumido family ug adunay tulo ka tenant nga nagnegosyo og gagmay’ng tindahan.
Miabot sa kapin walo ka oras ang operasyon sa mga bombero sa pagpalong sa kalayo tungod sa presensya sa mga produktong adunay oil sa usa ka grocery.
Sa inisyal nga imbestigasyon sa Bureau of Fire Protection, giingong nagsugod ang sunog sa usa ka karenderia ug dali mikatap sa ubang tindahan nga ginama sa light materials.
Walay naitalang nasamdan o namatay sa insidente samtang padayon pa ang imbestigasyon sa hinungdan sa sunog.