Duha ka piggery nga nag-operate sa Barangay Patpat, Malaybalay City ang posible mapahamtangan og violation tungod sa hugaw nga waste water discharge nga gituohang nakaapekto sa palibot.
Sa eksklusibong pakighinabi sa Bombo Radyo Malaybalay kang Kris Tabernero, Assistant City ENRO Officer nga napadad-an na og Notice of Violation ang mga tag-iya sa piggery ug posibling ipatawag sila sa usa ka technical conference aron ipasabot ang ilang obligasyon ug klarohon ang ilang baruganan.
Giingon ni Tabernero nga posible pa silang hatagan og panahon aron motubag sa maong isyu, apil na ang posibilidad nga motuman sa mga environmental compliance standards. Bisan pa niana, wala pa kini matagaan og Environmental Compliance Certificate (ECC) gikan sa DENR diin usa ka rekisito aron legal nga makapadayon sa operasyon.
Sa kasamtangan, lima ka piggery ang gi-monitor sa City ENRO sa mga barangay Patpat ug Dalwangan. Apan giangkon ni Tabernero nga naglisod sila og physical inspection sa mga pasilidad tungod kay adunay balaod sa mga piggery nga naglimit sa access sa mga awtoridad.
Tungod niini, drone surveillance ang gihimo sa buhatan aron masuta ang aktwal nga kahimtang sa sulod.Dugang pa ni Tabernero, wala pa’y klarong ordinansa ang syudad sa regulasyon sa waste water, nga maoy usa sa mga babag sa pagpahamtang og direkta nga silot sa lokal nga lebel. Gikinahanglan pa ang mas lig-on nga legal nga basihan aron mas mapatuman ang balaod sa tibuok syudad.