Samdan ang mga biktima sa duha ka manglahing aksidente nga natala sa Valencia City, Bukidnon.
Sa unang insidente, landing sa balay tambalanan ang usa ka 60-anyos nga lalaki human mabanggaan ang iyang gimanehong motorsiklo sa usa ka wagon nga sakyanan sa Purok 2, Barangay Batangan.
Giila ang drayber sa motorsiklo nga si alyas Reynaldo, samtang ang nagmaneho sa wagon mao si alyas Wilmar, 43 anyos, minyo ug residente sa Purok 4, Brgy. Lumbo.
Base sa inisyal nga imbestigasyon, parehas og direksyon ang duha apan wala matud pa nabantayan sa wagon ang motorsiklo hinungdan nga nadumbolan kini ug nalabay, nga maoy hinungdan sa pagkaangol sa drayber sa motorsiklo ug gilayon gidala sa ospital.
Sa laing insidente, samdan usab ang usa ka 22-anyos nga drayber nga si Harrison Opindo Baldo human mabangga ang iyang motorsiklo sa usa ka dakong iro sa Purok 13, Barangay Poblacion, ning milabayng adlaw.
Sumala sa kapulisan, kalit milabang ang iro sa dalan hinungdan sa bangga, nga miresulta sa pagkahulog sa motorsiklo ug mga samad sa lawas sa biktima nga gidala dayon sa Polymedic Hospital aron madapatan og medikal nga tensyon.