Anaa na karon sa Philippine National Police ang duha ka managsuon sa whistleblower nga si Julie Patidongan alyas “Totoy” sa kaso sa mga nangawalang sabungero.
Matud ni PNP Spokesperson BGen. Jean Fajardo, nadakpan sila sa southeast asia ubos sa liderato ni kanhi CIDG Director BGen. Romeo Macapaz, ug niabot sa Pilipinas niadtong Hulyo 22. giila silang si Elakim ug Jose Patidongan, nga mga‘missing links’ sa kaso sa mga nangawalang sabungero. Si Elakim giingong nakuhaan sa CCTV nga nag-withdraw og kuwarta gikan sa ATM account sa usa sa mga nawalang sabungero, samtang nakuhaan og video si Jose nga daw nag-escort sa laing sabungero sa wala pa kini mawala.
Si Jose daw adunay warrant alang sa iyang pagdakop tungod sa pagpanulis, samtang si Elakim nasakpan nga naggamit og lain nga ngalan sa iyang pasaporte nga si Robert Baylon, nga klaro nga paglapas sa balaod.
Giinsister ni Fajardo nga ang pagkasikop sa duha resulta sa lehitimong operasyon, sa pakigtambayayong sa Bureau of Immigration ug inubanan sa usa ka aprobado nga case operational plan.Ang opisyal midugang nga ang pagkasikop sa mga igsuon ni “Totoy” usa ka dakong kalamboan sa kaso, ug mahimong makahatag og mas klarong direksyon sa imbestigasyon sa pagkahanaw sa mga sabungero.