Nahimong dakong hulga alang sa mga drayber ang dugang usbaw sa presyo sa lana nga gipatuman karong adlawa.
Kini sumala kang Joel Gabatan, Regional Coordinator sa National Confederation Transportation Unit (NCTU), diin nagkahiusa matud pa ang mga drayber sa pagpadayag sa ilang kabalaka tungod sa nagkalisod nga kahimtang sa ilang panginabuhian.
Matud ni gabatan, nagplano ang maong grupo nga mosulat direkta sa Presidente aron ipaabot ang ilang hangyo alang sa dinaliang aksyon, lakip na ang pag-usab sa pletehan diin gisugyot niini ang minimum nga ₱15.00 alang sa unang upat ka kilometro ug dugang ₱1.00 sa matag mosunod nga kilometro.
Gipasiugda usab ni Gabatan nga sanglit dili kini matubag, mas mosamot ang kalisod sa mga drayber ilabina nga gilauman nga mosaka pa hangtod ₱140.00 ang matag litro sa krudo sa umaabot nga mga adlaw.
Gipasabot usab niini nga, ubos sa Oil Deregulation Law, wala nay gahum ang gobyerno sa pagkontrolar sa presyo sa lana ug nagsalig na lamang ang tanan sa desisyon sa mga dagkong kompanya sama sa Shell, Caltex, ug Petron.
Tungod niini, nanawagan sila sa dinalian nga pagtangtang o pag-usab sa 12% nga VAT ug uban pang buhis sa lana aron makuhaan ang palas-anon sa mga drayber.
Kini nga hangyo gipadayag ni Joel Gabatan isip usa sa mga pamaagi aron mahupay ang epekto sa walay hunong nga pagsaka sa presyo sa enerhiya.
Ang maong lakang gihimo isip paningkamot sa mga drayber nga maprotektahan ang ilang inadlaw-adlaw nga kita taliwala sa padayon nga pagsaka sa presyo sa lana sa merkado.