Gipadayag ni Senate Committee on Finance chair Sherwin Gatchalian, nga nagkinahanglan pa og dugang nga ₱7 bilyon ang gobyerno aron masuportahan ang posibleng repatriation sa Overseas Filipino Workers (OFWs) kung mograbe pa ang tensyon sa Middle East.
Matod ni Gatchalian, gibanabana nga mokabat sa ₱13 bilyon ang kinatibuk-ang pondo nga gikinahanglan aron mapapauli sa nasod ang mga OFW, lakip na ang mga undocumented workers.
Sa pagkakaron, adunay ₱6 bilyon nga nakatagana sa 2026 national budget alang sa repatriation efforts.
Kahinumduman nga sa pagdungog sa Senado niadtong Marso 6, giingon sa Department of Migrant Workers (DMW) nga kinahanglan nila og igo nga pondo aron mapondohan ang pagpauli sa mga Pilipino sa Middle East kung mosamot ang gubat sa maong rehiyon.
Matud usab ni Gatchalian nga kinahanglan pag-ayo nga tun-an ang sugyot nga suspindihon ang excise tax sa lana, ug himoon lamang kini nga katapusang opsyon taliwala sa hulga sa posibleng dako nga pagsaka sa presyo sa petrolyo tungod sa tensyon sa Middle East.
Dugang pa niini, kung suspindihon ang excise tax, moubos ang koleksyon sa gobyerno nga mahimong makaapekto sa mga serbisyong gihatag sa publiko. Dugang pa niya nga dili usab kini patas gumikan mas dako ang konsumo sa lana sa mga adunahan kumpara sa mga kabos.
Dili usab pabor si Gatchalian sa pagsuspinde sa value-added tax (VAT) sa lana, tungod mas komplikado ang sistema niini, ilabi na sa bahin sa input ug output tax sa mga supplier.
Sa katapusan, nanawagan ang senador sa Department of Energy (DOE) nga hugtan nga bantayan ang mga oil companies ug retailers aron malikayan ang posibleng pag-abuso sa presyo sa petrolyo taliwala sa gilauman nga pagsaka sa presyo niini.