Gibatikos sa social media ang usa ka AI-generated nga hulagway ni US President Donald Trump diin makita kini nga nagsul-ob og sinina sa Santo Papa, pipila ka adlaw sa wala pa nagsugod ang conclave sa Vatican aron sa pagpili og bag-ong Santo Papa human sa kamatayon ni Pope Francis.
Ang maong hulagway, nagpakita nga si Trump naglingkod sa usa ka maanindot nga lingkuranan, nagsul-ob og puti nga vestments ug mitra.
Gipost kini ni Trump sa Truth Social ug dali usab kining gi-repost sa opisyal nga account sa White House.
Sumala sa obispo sa New York ug pipila ka konserbatibong grupo nga supak kang Trump, ilang giingon nga kini usa ka “pagpasipala” ug “insulto sa pagtuo” sa Simbahang Katolika.
Samtang nagdumili ang Vatican sa paghatag og komento mahitungod sa isyu.
Sa miaging mga adlaw,nagkomedya si Trump nga buot niining mahimong Santo Papa.
Gihisgutan sab niini si Cardinal Timothy Dolan isip “maayong kandidato,” bisan pa nga wala siya sa listahan sa mga labing posibleng mapili nga Papa.
Sa kasaysayan, wala pay Amerikano nga nahimong Santo Papa.
Niadtong Pebrero, nagpost usab si Trump og AI-generated nga larawan nga nagsul-ob og korona, uban sa pahayag nga tapos na ang congestion pricing sa New York.
Alang sa pipila ka mga supporter,bugalbgal lamang kini ni Trump, apan alang sa daghang katoliko, kini dili kataw-anan ug giisip nga usa ka paagi sa pagyatak sa balaan nga proseso sa pagpili sa sunod nga lider sa Simbahang Katoliko.