Gitawag nga peke ug makauulaw ang mga nagkalat nga alegasyong paglambigit kang First Lady Liza Araneta Marcos sa kamatayon sa negosyanteng si Paolo Tantoco.Matod ni USec. Claire Castro, gigamit lang kini sa pipila ka mga obstructionist aron dauton ang Unang Ginang, si Presidente Ferdinand Marcos Jr., ug ang administrasyon.
Matud sa kalihim nga makasubo nga naapil sa pamulitika ang mga pribadong tawo nga anaa pa sa pagbangutan. May kalabutan niini, gisaway sa Palasyo ang giingong peke nga police report nga gipakalat sa social media, diin giingong gidugangan lang og impormasyon.
Gitawag kini ni Castro nga dakong bakak gumikan bisan kinsa makapahimo og kaugalingong beripikasyon ngadto sa Beverly Hills Police Department aron mapamatud-an nga ang mga idugang nga linya wala sa orihinal nga dokumento.
Gisalikway sab sa Palasyo nga si Tantoco kabahin sa opisyal nga entourage ni First Lady sa iyang biyahe sa Los Angeles.Matud pa niini dunay kauban nga US security service ug Presidential Security Group ang First Lady ug lahi sab siya og hotel nga gipuy-an, dili pareho sa gipuy-an ni Tantoco.
Gipasabot sab sa Palasyo nga dokumentado sa social media ang mga opisyal nga kalihukan sa Unang Ginang niadtong Marso 8, lakip ang konsyertong iyang gitambongan para sa mga Pilipino uban ni Tourism Secretary Christina Frasco.