Gipahibalo sa Department of Energy (DOE) ang laing hugna sa dakong pagsaka sa presyo sa mga produktong petrolyo nga magsugod karung adlawa, Martes, Marso 24.
Matud pa ni Energy Secretary Sharon Garin, ipatuman ang umento nga P6.47 matag litro sa gasolina, samtang moabot usab sa P11.88 ang isaka sa presyo sa diesel, ug P13.66 matag litro alang sa kerosene
Bisan pa niining dako nga pagsaka, gipasabot sa gobyerno nga “nagmalinawon” na ang lihok sa presyo sa lana sa merkado sa kalibutan kon itandi sa nangaging mga adlaw.
Gumikan niini, padayon ang hangyo sa DOE ngadto sa mga kompanya sa lana nga kon mahimo, i-agi lang og “staggered” o hinay-hinay nga umento ang presyo aron dili kaayo mabug-atan ang mga konsumidor.
Apan giangkon ni Sec. Garin nga adunay mga kompanya nga dili makahimo sa hinay-hinay nga pagsaka tungod sa pagkalugi.
Sa pikas bahin, gipasalig sa gobyerno nga duna pay igong suplay o stockpile sa lana ang nasud nga molungtad hangtod sa unang semana sa Mayo, dungan sa pag-abot sa dugang mga kargamento sa lana sa nasud.