Gisugdan na ang pagtrabaho sa detour road aron mabalik ang normal nga biyahe human makaapekto sa daku nga kalangan ug kadaot sa negosyo ang pagkahugno sa kalsada sa Overview, Quezon, Bukidnon sa milabay’ng mga bulan.
Sa pakighinabi sa Bombo Radyo Malaybalay, gikumpirma ni Public Information Officer sa Quezon, Bukidnon nga si Forts Cabarde nga nasugdan na sa kontraktor ang pagtukod sa temporaryong detour road sa Bukidnon–Davao Road. Gilauman nga mahuman kini sulod sa 45 ka adlaw aron dali nga maibalik ang siguridad sa trapiko nga naapektuhan sa insidente.
Gipasabot usab ni Cabarde ang isyu bahin sa giingong access road nga nakita lamang sa social media. Matod niini, nasuta nga adunay pipila ka tawo nga miagi niini, apan wala kini ilhana nga proyekto sa lokal nga kagamhanan o sa DPWH. Bisan pa man, iyang gipasalamatan ang nagbuhat sa maong dalan apan mipahimangno nga base sa assessment, dili kini maayong agian ilabi na sa mga pasahero nga padulong sa Davao, mahitungod na pipila lamang ka mga sakyan ang makaagi tungod sa kalisod na mopasaka niini.
Sa pagkakaron, nagpabilin ang koordinasyon sa lokal nga gobyerno ug DPWH aron masiguro nga hapsay ang pagtrabaho sa detour road samtang gihulat ang opisyal nga pahibalo sa pagbalik sa normal na biyahe.