Magpabilin ang pagdeploy sa mga personahe sa kapulisan sa tibuok Northern Mindanao hangtod sa adlawng Lunes human sa Semana Santa, dungan sa panawagan sa publiko nga magpabiling alerto alang sa usa ka malinawon nga selebrasyon.
Sa pakighinabi sa Bombo Radyo Malaybalay kang Police Major Joann G. Navarro, ang tigpamaba sa Police Regional Office 10 (PRO-10), iyang gipahayag nga sukad sa pag-implementar sa “Ligtas Holy Week 2026” niadtong Dominggo sa Lukay (Palm Sunday), wala’y natala nga bisan unsang untoward incident sa tibuok Region 10, ilabina sa mga simbahan ug uban pang dapit-sambahan.
Sa pagkakaron, anaa sa full alert status ang tibuok pwersa sa kapulisan diin naka-deploy na ang mga personahe sa mga strategic areas sama sa mga pilgrimage sites, tourist destinations, ug uban pang dapit nga gilaumang dagsaon sa katawhan.
Gipasabot usab ni Pmaj. Navarro nga maayong pagka-plano ang deployment sa kapulisan uban sa suporta sa Armed Forces of the Philippines (AFP), Philippine Coast Guard (PCG), ug Bureau of Fire Protection (BFP). Nagtukod usab og mga Police Assistance Desks (PADs) sa nagkadaiyang dapit aron mapadali ang paghatag og serbisyo ug seguridad sa mga turista ug mga deboto sa tibuok rehiyon.