Milusad sa sunod nga hugna sa ilang lihok-protesta ang mga mag-uuma aron pahimangnoan ang Department of Agrarian Reform (DAR)–Region 10 nga hangtod karon wala pa gihapon natubag ang ilang dugay nang hangyo nga makabaton og Certificate of Land Ownership Award (CLOA) sa yutang ilang gi-uma sulod sa kapin duha ka dekada.
Sa pakighinabi sa Bombo Radyo, matod pa ni Pat Pangantihon, Policy and Communications Officer sa Philippine Movement for Climate Justice (PMCJ) sa Mindanao, tuig 2011 pa nagsugod ang revalidation sa CLOA sa mga benepisyaryo sa Bukidnon, apan gibalik kini sa tuig 2017.
Nasayran nga gisaaran pa sa DAR-10 nga sulbaron ang isyu sa Agusto 2024, apan misulod na ang tibuok tuig nga walay konkretong aksyon, hinungdan nga mituo ang PMCJ nga intensyonal ang paglangan sa proseso.
Gipasabot sa grupo nga ang paglangan sa CLOA usa ka porma sa sistematikong pagpangilog sa yuta, hinungdan nga padayon silang mosuporta sa mga lokal nga rally ug dayalogo aron ipadayag ang tinuod nga kahimtang sa mga mag-uuma