Nagmando si Agriculture Sec. Francisco Tiu Laurel Jr. sa Food Terminal Inc. (FTI) nga maggahin og pondo alang sa pagpamalit og dagkong bulto sa monggos direkta gikan sa mga lokal nga mag-uuma sa nasud.
Ang maong lakang nagtumong sa pagpataas sa presyo sa maong mga produkto sa umahan ug aron maminusan ang pagsalig sa Pilipinas sa pag-import gikan sa gawas sa nasud.
Sumala ni Laurel, giila karon sa Department of Agriculture (DA) ang munggos isip mga “priority high-value crops” karong tuiga.Gimanduan ang FTI nga paliton ang hangtod sa 80 porsyento sa lokal nga produksyon.
Katuyoan niini nga masiguro ang kita sa mga mag-uuma pinaagi sa paghatag og proteksyon gikan sa kalit nga pag-usab-usab sa presyo sa merkado.
Pinaagi niini, gilauman nga mas madasig pa ang mga lokal nga mag-uuma nga palapdan ang ilang pananom tungod sa garantiya nga adunay mupalit sa ilang mga abot sa saktong presyo.