Gihagit ni kanhing Ilocos Sur Governor Chavit Singson si Presidente Ferdinand Marcos Jr. nga munakaog sa katungdanan isip lider sa nasud tungod sa nagpadayong isyu sa korapsyon ug kakulang sa aksyon sa gobyerno.
Sumala ni Singson, ang flood control project controversy nga kasamtanagang ginaimbestigahan sa mga awtoridad usa lamang matud pa ka drama diin gimugna sa administrasyon aron matabunan ang mga seryosong problema sa nasud sama sa kapobrehon, kawad-on sa trabaho, ug taas nga presyo sa mga palaliton.
Gipadayag pa ni Singson nga wala nanginahanglan og dungog o gahum ang usa ka tinuod nga lider, kondili kaisog ug pagkamatinud-anon sa pagbaton sa responsibilidad.
Matud pa niini, ang pag-resign ni Marcos dili usa ka buhat sa pagkatalawan kun dili timaan sa tinuod nga liderato, aron hatagan og kahigayonan ang mas maayo nga lider nga makasulbad sa mga problema sa katawhan.
Gi-awhag usab ni Singson ang mga opisyal sa gobyerno nga magtinabangay sa paglimpyo sa sistema ug undangon ang panagpanalipod sa mga korap nga opisyal aron mapanumbalik ang pagsalig sa publiko sa liderato sa nasud.