Nagpabilin sa Alert Level 3 ang Bulkang Mayon samtang nagpadayon ang pagbuga niini og lava sa ika 32 nga adlaw sa iyang “effusive eruption.”
Sa pinakaulahing monitoring sa PHIVOLCS niadtong Sabado, Pebrero 7, nakarekord og subling pag-awas sa lava gikan sa summit crater sugod alas 6:03 sa gabii niadtong Biyernes. Tungod niini, nasaksihan ang mga rockfall events, incandescent lava flows ug ang delikadong Pyroclastic Density Currents (PDC) o “uson.”
Matud pa sa datus, ang agas sa lava miabot na sa 3.77 kilometro sa Basud Gully o sa sidlakan nga bahin, 1.59 kilometro sa Bonga Gully o habagatan-sidlakan ug 1.34 kilometro sa Mi-isi Gully sa habagatan nga bahin.Sa sulod sa 24 oras, nakarekord ang PHIVOLCS og 401 ka rockfall events, 17 ka PDCs, ug duha ka volcanic earthquakes.
Miabot usab sa 1,799 ka tonelada sa sulfur dioxide ang gibuga sa bulkan.Hugot nga gipahinumdum sa PHIVOLCS nga bawal ang pagsulod sa 6-kilometer Permanent Danger Zone (PDZ) tungod sa risgo sa kalit nga pagbuto, pagdahili sa bato ug makamatay nga uson nga paspas nga nagdagayday gikan sa bulkan.