Gipalig-on ang kasiguruhan sa pagkaon sa Mindanao pinaagi sa lig-ong produksyon sa humay sa Bukidnon, base sa pinakabag-ong datos nga nagpakita nga sobra pa sa igo ang ani ug suplay para sa probinsya.
Sa pakighinabi sa Bombo Radyo Malaybalay, gipasabot ni Regional Executive Director sa Department of Agriculture-X Jose Apollo Y. Pacamalan nga anaa sa 17,000 metric tons ang kasamtangang produksyon sa humay sa Bukidnon. Dugang niini, ang 60,000 metric tons nga suplay nagpasabot nga adunay sobra nga 43,000 metric tons, nga igo na alang sa 115 ka adlaw ug maoy ipanghatag sa ubang probinsya nga kulang sa maong produkto.
Mipadayag pa si Pacamalan nga padayon nilang paningkamutan nga suportahan ang mga mag-uuma, ilabi na kay giila ang Bukidnon isip food basket sa rehiyon. Iyang giingon nga kung kanunay nga maayo ang dagan sa produksyon sa probinsya, makahatag kini og igo ug lig-on nga suplay sa mga kasikbit nga lugar nga nagkinahanglan.
a pagkakaron, nagpadayon ang Department of Agriculture sa pagpahigayon og mga programa aron mapalambo ang agrikultura ug masiguro nga ang Bukidnon magpabiling usa sa labing dakong tagasurta sa pagkaon sa rehiyon.