Gipangulohan na sa Department of Agriculture ang mga proyektong Farm-to-Market Road kon FMR nga kaniadto gidumala sa Department of Public Works and Highways.
Kini matud pa aron malikayan ang korapsyon ug masiguro nga ang proyekto makatabang sa mga mag-uuma.
Sa pakighinabi sa Bombo Radyo kang Jose Apollo Pacamalan, Regional Executive Director sa DA Region X, gibutyag niini nga maayo ang dagan sa maong programa diin nakakuha usab og P4.3 bilyon nga budget alang sa Northern Mindanao.
Gawas pa niini, dako usab ang gipaabot nga suporta ug pondo alang sa lalawigan sa Bukidnon, nga giila isip sentro sa agrikultura sa Northern Mindanao.
Subay sa mandato ni Secretary Francisco Tiu Laurel Jr. sa pag-audit sa tanang FMR projects nga natukod gikan tuig 2021 hangtod 2025, aron masuta ang kalidad ug kahimtang sa mga dalan, miluwat si Pacamalan nga kompleto ug makita nga nagamit ang mga FMR nga sukad tuig 2021.
Apan, gibutyag usab nga adunay pipila nga mga dalan nga nadaot tungod sa pag-agi sa mga dagkong trak.
Samtang gisiguro sa DA nga giaksyonan gilayon kini ug gisusi ang dugang pang mga lakang aron subling mapuslan ang maong dalan nga gitumong alang sa mga mag-uuma.