Padayon ang hot pursuit operation sa kabukiran sa Talakag, Bukidnon human brutal nga gipatay ang usa ka 35-anyos nga lalaki sa Purok 6, Sitio Babagyohan, Barangay Dagumbaan, Talakag, Bukidnon.
Sa pakighinabi sa Bombo Radyo Malaybalay kay Police Captain Shiela Joy Jangad, tigpamaba sa Bukidnon Police Provincial Office, gibutyag niini nga padayon ang imbestigasyon ug pag-ila sa suspek isip top priority sa kapulisan.
Ang biktima, nga nailhan sa alyas “Ruben,” nakit-an nga patay sa Purok 6, Sitio Babagyohan, nga adunay samad pinusilan sa ulo ug dinunggaban sa lawas. Sunod sa impormasyon sa pamilya, giadtuan sa biktima ang bahin sa ilang baka human gipahibalo nga natanggal ang pisi, apan wala na kini nakauli.
Gisuspetsahan karon ang usa ka lalaki nga person of interest, samtang nagpadayon ang operasyon sa kapulisan.