Gisaulog sa Bombo Radyo Philippines ang ika-60 nga tuig sa media excellence dungan sa paghandum sa World Radio Day ug pagpasalig nga magpabilin ang lig-on nga baruganan sa responsable nga journalism taliwala sa nag-usab nga panahon
Sa pamahayag ni Ms. Margaret Ruth C. Florete, Presidente ug CEO sa Bombo Radyo Philippines, iyang gihulagway ang unom ka dekada nga operasyon isip “unmatched performance” sa public service nga nakakuha sa hugot nga pagsalig sa mga Pilipino sa tibuok nasud.
Matud ni Florete, nagpabiling nagsunod ang network sa ilang misyon nga moalagad ug mo-edukar sa mga komunidad. Luyo sa hagit sa modernong panahon, gipasigarbo sa CEO nga ang Bombo Radyo duna nay 32 ka fully digitalized radio stations nga nag-operate nationwide aron masiguro ang paspas ug klaro nga paghatag og impormasyon.
Usa sa mga nahimong sentro sa mensahe ni Florete mao ang baruganan sa network kalabot sa teknolohiya, diin iyang gipasabot nga ang Artificial Intelligence (AI) usa lamang ka “tool” ug dili kini mamahimong muhulip sa tinuod nga tingog sa journalism.
Gipaniguro sa kadagkoan nga magpabilin ang ilang komitment sa ethical broadcasting ug public accountability. Gitapos ni Florete ang iyang pamahayag pinaagi sa pagpasalamat sa mga tigpaminaw, nga gitawag og Ka-Bombo ug Kasta-nation, kinsa maoy naghimo sa sibyaanan nga kabahin sa ilang matag adlaw nga kinabuhi sulod sa unom ka dekada.