Gihagit ni Malaybalay City Mayor Warren Jay Pabillaran ang mga Board of Directors sa Water District nga tubagon ang mga isyu mahitungod sa serbisyo sa joint venture sa suplay sa tubig.
Kahinumdoman nga kaniadtong mga milabay nga semana, nisaad si Pabillaran nga magpatawag kini og miting sa mga nagpaluyo sa joint venture mahuman ang eleksiyon.
Human sa kadaugan niini isip re-elected mayor sa Malaybalay City, gitubag niini ang mga isyu ug nagbuhat na kini og mga lakang aron masolusyonan ang nagpadayong mulo sa mga konsumante ning siyudad.
Gibulgar ni Pabillaran, nga dunay mga tubo sa tubig sa Barangay Patpat nga sakop sa Malaybalay City, apan wala matud pa kini suplay sa tubig ug dugang pa ni Pabillaran nga igo ra kini gi-ampoan ug gipailawom sa ritwal ug wa kini nasayod og duna ba groundbreaking nga gipahigayon.
Dugang pa sa mayor, nga puros ra matud pa istorya og taman lamang sa papel ang mga plano sukwahi sa gipahigayong joint venture.
Kahinumdumang nanghinambog og 200 milyones nga pondo ang Prime Water alang sa paghatag og bastanteng suplay sa tubig ngadto sa mga konsumante, apan hangtod karon, wala pay resulta.