Nakahimo na ang pamilya Gammarelli sa bag-ong biste nga souton sa musunod nga Santo Papa. Matod sa head tailor nga si Massimiliano Gammarelli, nakahimo na sila og pila kalibo nga sanina sa mga pari.
Gani, usa ka dakong pasindungog alang kanila ang pagtahi og biste alang sa bag-ong santo papa. Naandam na matud pa ni Mancinelli ang puti nga mga vestment, lakip na ang cassock, sash, ug skullcap, nga adunay tulo ka mga ka set, small medium, ug large diin kini haom sa 135 ka mga kardinal, gikan sa pinakagamay hangtod sa pinakataas.
Sa pikas bahin, nagpagawas na og listahan sa mga kandidatong kardinal nga posible mapili aron mahimong musunod nga santo papa. Ang pipila ka mga potensyal nga kandidato nga posibleng pilian maggikan sa Europa kansa giilang si Pietro Parolin, 70 anyos, kansa dugay nang Secretary of State.
Lakip sab sa pilian si Pierbattista Pizzaballa, 60 anyos nga gikan sa kongregasyong Latin Patriarch of Jerusalem. Ikatulo sab sa posibleng pilion mao si Matteo Maria Zuppi, 69 anyos, arsobispo sa Bologna, Claudio Gugerotti, 69 anyos og usa ka Academic ug multi-lingual diplomat; Jean-Marc Aveline, 66 anyos;Anders Arborelius nga taga Sweden, 75 anyos, Bishop of Stockholm; Mario Grech nga gikan sa Malt, 68 anyos, Bishop emeritus sa Gozo; Peter Erdo sa Hungary, 72 anyos. Posible sab nga pilion si Jean-Claude Hollerich, 66 anyos, arsobispo sa Luxembourg.
Samtang sa Asya, humot karon ang ngan ni Luis Antonio Tagle, 67 anyos, gikan sa Metropolitan Archbishop emeritus of Manila. Sa higayong duna nay mapili nga bag-ong lider sa simbahang katoliko, mugawas kini sa bintana sa St. Peter’s Basilica ug dunay musinggit og ‘Habemus Papa!’ nga nagpasabot nga duna nay bag-ong gituboy nga lider sa simbahan.