Isip tabang ngadto sa komunidad dili lamang pagresponde sa sunog ang gitrabaho sa mga bombero kundili apil usab ang pagtukod ug mga pasilidad sa edukasyon sama sa mga school building.
Sa eksklusibong pakighinabi sa Bombo Radyo Malaybalay kay FSUPT ROMEO L MIRANDA, Provincial Fire Marchal sa Bureau of Fire Protection (BFP) Bukidnon, nga magtukod sila ug duha ka classroom isip kabahin sa ahensya nga Adopt a school program.
Matod pa niini, nag groundbreaking ceremony na sila gahapong adlawa alang sa pagtukod sa duha ka classroom sa Tamugawi Elementary School sa Barangay Mahayag, syudad sa Malaybalay.
Ang proyekto giingon niining dako ug tabang sa komunidad ilabi na nga ang maong eskwelahan adunay kapin pito ka kilometro ang gilay-on gikan sa national highway hinungdan nga lisod kini ma access sa mga estudyante ug magtutudlo.
Gidugang pa niini nga ang timeline sa pagtukod magdepende sa budget sa proyekto. Dugang pa niini, daghan pang programa ang BFP alang sa komunidad sama sa dental mission, medical outreach, ug uban pang inisyatibo nga nagtinguha nga mabalik ang serbisyo ngadto sa katawhan.