Nagsumite si Sen. Loren Legarda og Senate Bill No. 2020 o ang gitawag nga Bayanihan 3: Power to the People Act, usa ka sugyot nga nagtinguha sa pagtubag sa epekto sa global nga krisis sa lana ug paghatag dayong tabang sa mga Pilipino.
Ilalom sa maong sugyot, ilhon ang kasamtangang national emergency ug hatagan ang gobyerno og gahum sa pagpatuman sa mga lakang aron moubos ang presyo sa lana ug kuryente, masiguro ang igong suplay sa pagkaon, ug maghatag og direktang ayuda sa mga apektadong sektor.
Nagamando usab ang maong sugyot sa mga kompanya sa lana nga mahimong mas transparent sa ilang operasyon pinaagi sa pagpagawas sa detalye bahin sa presyo, gasto, imbentaryo, ug suplay aron malikayan ang dili makatarunganong pagtaas sa presyo.
Gipahamtang usab niini ang temporaryo nga pagkunhod o suspensyon sa excise tax ug ang zero VAT sa produktong petrolyo, uban sa kondisyon nga direktang mabati sa mga konsumidor ang epekto niini sa presyo sa merkado.
Sa sektor sa kuryente, hatagan og gahum ang Energy Regulatory Commission sa pagpahigayon sa pagpaliban sa bayad nga walay interes ug multa, samtang gibabagan ang dali nga disconnection sa mga kwalipikadong konsumidor.
Naglakip usab ang sugyot og direktang subsidy sa krudo para sa mga transport worker, mag-uuma, ug mangingisda, nga nagtinguha sa pagpakunhod sa ilang gasto sa tunga sa krisis.
Gawas pa niini, lakip sa mga lakang ang pagpalig-on sa suplay sa pagkaon pinaagi sa pagpasayon sa logistics, paghatag og exemption sa toll para sa transportasyon sa pagkaon, ug pagdasig sa community ug urban farming.
Sumala ni Legarda, ang sugyot dili lang para sa dayong ayuda kundi para usab sa long-term nga solusyon, lakip ang pagbalhin ngadto sa mas lig-on ug limpyo nga sistema sa enerhiya aron maminusan ang pagsalig sa imported fuel.
Dugang pa niini, nga importante nga adunay klaro nga pag-analisa ug transparency sa pagpatuman sa mga lakang aron masiguro nga ang matag polisiya epektibo, patas, ug tinuod nga makabenepisyo sa katawhan.