Barbie Collector, nakatala og World Record human mailhan ang 19 ka manika pinaagi sa paghikap

Usa ka katingalahang world record ang nakab-ot sa usa ka sikat nga kolektor sa Barbie human niini malampusong nailhan ang nagkadaiyang klase sa manika bisan pa man og gitabonan ang mga mata.

Si Bettina Dorfmann, kinsa nailhan na kaniadto sa Guinness World Records tungod sa labing dako nga koleksyon sa Barbie sa tibuok kalibutan, mipakita na usab og talagsaong abilidad pinaagi sa pag-ila sa mga manika gamit ang paghikap.

Nahimong highlight sa German television program nga The Great Show of World Records ang gihimong hagit ni Dorfmann diin gitabonan ang iyang mga mata samtang usa-usang gihatag kaniya ang mga manika.

Sulod lamang sa tulo ka minuto, natingala ang tanan human niini husto nga natumbok ang ngalan sa 19 ka managlahing Barbie.