Adunay gihuptang ebidensiya ang giingong bagman ni Vice President Sara Duterte aron pamatud-an ang mga alegasyon batok sa Bise. Kini matud pa ni ML Partylist Representative Laila de Lima. Bag-o lang, mitumaw ang sworn affidavit sa giingong bagman ni Bise Presidente Sara Duterte nga si Ramil Madriaga.
Seryoso ug bug-at ang iyang mga alegasyon batok sa Bise, sama sa giingong kandidatura ni VP Sara niadtong 2022 national elections nga gipondohan sa mga POGO operators ug drug dealers. Nakabilanggo karon si Madriaga sa BJMP-Taguig tungod sa kasong kidnapping. Niadtong Disyembre 8, giingong naka-istorya ni Madriaga sa bilanggoan ang Liberal Partylist Congressman nga si Laila de Lima. Matud ni De Lima, gibutyag ni Madriaga nga aduna siyay mga ebidensiya nga makasuporta sa iyang mga alegasyon batok sa Bise.
Sa wala pa kini, nakadawat usab si De Lima og sulat gikan ni Madriaga nga may petsang Nobyembre 17. Gihatod ang sulat ni Madriaga kang De Lima pinaagi sa iyang abogado, nga si Attorney Raymond Palad. Didto, nangayo og tabang si Madriaga sa iyang mga kaso. Gipasabot ni De Lima nga angay susihon sa Office of the Ombudsman ang mga alegasyon ni Madriaga tungod kay seryoso ug bug-at kini.
Gikinahanglan usab nga segurohon ang seguridad ni Madriaga sulod sa bilanggoan, nunot sa iyang gipamahayag. Una nang gikabutyag ni kanhi Presidential Spokesperson Harry Roque nga black propaganda lang ang mga alegasyon batok ni VP Sara.
Posibleng gigamit lang si Madriaga sa mga gustong moluba (mudaot) sa Bise. Dugang ni Roque, dili personal nga kaila ni VP Sara si Madriaga.