Aron nga istriktong pamatuman ang speed limit sa syudad sa Malaybalay mipalit ang City Government sa Malaybalay, ubos sa liderato ni Mayor Warren Pabillaran ug pinaagi sa koordinasyon sa City Disaster Risk Reduction and Management Office (CDRRMO) nga gipangulohan ni Mr. Alan J. Comiso, og EPSON Hand-held Laser Speed Gun Camera ug YUNTENG Video Tripod.
Gitagana kini aron opisyal nga magamit sa Traffic Management Center sa syudad. Gitinguha sa maong inisyatiba ang estriktong pagpatuman sa speed limit sa mga kadalanan, paglikay sa mga disgrasya nga may kalabutan sa overspeeding, ug pagsuporta sa mga traffic enforcer aron mahimong mas epektibo ang ilang pagserbisyo sa kalsada.
Gilauman nga pinaagi sa paggamit sa maong mga gamit, mas mapaayo ang dagan sa trapiko ug malikayan ang mga katalagman sa kadalanan. Pahimangno ni Mayor Pabillaran nga gitawag nila aron mag-alagad nga may garbo ug pasidunggan ang Malaybalay pinaagi sa matinud-anong serbisyo nga may kasingkasing.