Nakaplagan ang patay nga lawas sa usa ka bag-ong natawong batang babaye nga naglutaw sa Pulangi River, sakop sa Purok 9, Barangay North Poblacion, Maramag, Bukidnon pasado alas-8 sa buntag kagahapon, Octobre 16, 2025
Sa eksklusibong pakighinabi sa Bombo Radyo Malaybalay kay PLTCOL Alexander Eugenio, hepe sa Maramag Municipal Police Station nga usa ka lalaki nga namingwit ang nakadiskubre sa patay nga lawas sa maong bata nga aduna pay pusod diin timailhan nga bag-o kining gihimugso.
Saysay pa ni Eugenio, posibleng gilabay kini ngadto sa suba human pagkahimugso gikan sa layo gumikan adunay 2 kilometros ang gilay on sa lugar ayha ang mga balay.
Gihangyo usab ni Eugenio ang publiko nga motabang sa imbestigasyon pinaagi sa pag-report kung adunay nabantayan nga babaye nga buros nga kalit lang nawala o wala na magpakita sa ilang komunidad. Gi awhag ang katawhan nga ipahibalo dayon kini sa ilang buhatan aron matino kung kinsa ang responsable sa maong krimen.
Sa pagkakaron, anaa na sa punerarya ang patay nga lawas sa bata human kini girespondehan sa MDDRMO Maramag. Padayon pa ang imbestigasyon sa kapulisan aron matumbok ang suspetsado.
Dugang pa ni PLTCOL Eugenio, sa miaging mga bulan, malampuson nga nasulbad ang pipila ka mga krimen sa Maramag. Nanghinaut usab kini nga masulbad dayon ang bag ong hitabong insidente.