Posibleng mas molugway pa ang gidugayon sa pagka-suspende ni Cavite 4th District Representative Francisco “Kiko” Barzaga sa House of Representatives. Kini human mipasaka og dugang nga ethics complaint ang liderato sa National Unity Party (NUP) batok kaniya.
Sumala ni Deputy Speaker ug NUP Chairman Ronaldo Puno, seryoso karon nga gitun-an sa partido ang pagduso sa hingpit nga pagpalagpot o expulsion ni Barzaga gikan sa Kongreso. Giingong wala gihapon nag-usab ang batan-ong magbabalaod ug nagpadayon sa iyang “dili maayong pamatasan” bisan pa man sa kasamtangan niining 60-day suspension.
Nasayran nga napahamtangan og suspensyon si Barzaga tungod sa iyang mga binastos ug walay respeto nga social media posts batok sa institusyon. Apan inay maghinulsol, giingong mipadayon kini sa pagpangataki ug pagpakatap og mga pasangil batok sa iyang mga kauban sa Kamara nga wala’y igong basehan.