Gipadayag si Atty. Salvador Panelo, kanhi Chief Presidential Legal Counsel, nga buo ang iyang desisyon nga malakip sa defense team ni kanhi Pangulong Rodrigo Duterte samtang giatubang niini ang kasong crimes against humanity sa International Criminal Court (ICC).
Sa usa ka panayam, gipasabot sa kanhi Duterte appointee nga gusto niining makasulod sa legal team aron makatabang sa pagdepensa sa kanhi pangulo.
Tungod niini, nag-apply si Panelo og accreditation sa ICC pipila ka adlaw na ang milabay. Dugang pa sa batikang abogado, gusto usab niya nga makabisita ug makastorya si Duterte didto sa iyang detention cell sa The Hague aron mahisgutan ang kaso nga iyang giatubang.
Human sa pagpasa sa iyang aplikasyon, gilauman ni Panelo nga mokabat og mga walo ka bulan una magpagawas og desisyon ang ICC bahin sa iyang request.
Una nang gipasa sa iyang anak nga si Salvador Paolo Panelo Jr. ang aplikasyon uban ang tanang gikinahanglang dokumento.