Ipadayun sa ICI-Technical Working Group for Asset Recovery ang pagbawi sa mga kawat nga pondo ug kabtangan gikan sa mga nalambigit sa maanomalyang flood control projects, bisan pa man kung matapos na ang operasyon sa Independent Commission for Infrastructure (ICI) sa Marso 31, 2026.
Sumala ni ICI-Technical Working Group chairperson USec. Renato “Aboy” Paraiso, wala pa sila makadawat og pormal nga pahibalo o direktiba gikan sa komisyon, partikular gikan mismo sa chairman nga si retired Justice Andres Reyes Jr., nga nagrekomenda nga tapuson na ang operasyon sa komisyon.
Apan, nagpakita na og suporta ang Office of the Ombudsman ug Office of the Solicitor General aron ipadayon ang trabaho sa technical working group sa pagrekober sa kawat nga mga asset.
Matud pa ni USec. Paraiso, nakahimo na sila og mga mekanismo nga magahatag og paagi sa gobyerno aron marekober ang mga asset nga konektado sa mga maanomalyang proyekto.
Bisan pa nga nanginahanglan kini og halapad nga imbestigasyon ug pagsubay kung asa gibalhin ang maong mga asset, nagtuo si USec. Paraiso nga adunay na’y nahimong progreso ang grupo.
Base sa pinakabag-ong datos nga nahisgutan sa ilang miting, miabot na sa P4.8 billion ang kantidad sa mga narekober ug na-freeze nga mga asset.
Padayon nga gi-monitor sa technical working group ang proseso aron masiguro nga walay mapapas nga kawat nga pondo ug kabtangan ug mapadali ang hustisya alang sa publiko.